Ekkert verði úr fyrirhugaðri verðbólgu fylgi aðrir fordæmi IKEA

Ikea á Íslandi hefur ákveðið að lækka vöruverð á öllum sínum vörum um tvö komma átta prósent. Ástæðan er meðal annars sterkari gjaldmiðill gagnvart evru og hagstæðir kjarasamningar, að sögn framkvæmdastjóra verslunarinnar. Hann skorar á aðrar verslanir að fylgja þeirra fordæmi.

Morgunblaðið sagði frá því í dag að IKEA hefði ákveðið að lækka vöruverð í verslun sinni, á níu þúsund vörum, um tvö komma átta prósent að meðaltali. Kynntur verður nýr vörulisti í næstu viku en hann markar upphaf nýs rekstrarárs hjá IKEA, nýtt verð tekur gildi og fyrirtækið skuldbindur sig til að halda verðinu óbreyttu í eitt ár.

Þrjár meginástæður

„Það eru nokkrar ástæður, eða margar. Stöðugleiki er ein ástæða, það er búið að ríkja hér mikill stöðugleiki bæði hvað varðar verðbólgu og gengissveiflur. Það skiptir miklu máli í okkar umhverfi og flestra reyndar. Kjarasamningarnir sem voru gerðir eru í takt við þær væntingar sem við vorum með. Krónan er búin að vera að styrkjast gagnvart evrunni og öðrum gjaldmiðlum og það hjálpar sannarlega mikið til fyrir fyrirtæki í innflutningi. En síðast en ekki síst er búið að aukast gríðarlega mikið allt umfang verslunar,” segir Þórarinn Ævarsson, framkvæmdastjóri IKEA.

Hann segist fullviss um að geta staðið við þessar skuldbindingar, þrátt fyrir að bæði verðbólgu og verðhækkunum sé spáð á þessu ári. „Við höfum staðið af okkur í gegnum árin tugprósenta verðbreytingar á krónunni gagnvart miðlum og ekki hækkað eða lækkað verð, nema þetta eina skipti árið 2008 þegar krónan tapaði helmingi af verðgildi sínu. En annars munum við standa við þetta,” segir hann og hvetur um leið aðrar verslanir til að fylgja þeirra fordæmi.

Fyrirtækin hafi mikið um málið að segja

„Ég vonast til að fleiri fylgi og annað hvort sleppi því að hækka eða lækki og þá mun þessi verðbólga sem Seðlabankinn spáði í morgun ekkert ganga eftir. Þannig að það eru fyrirtækin í landinu sem hafa helling um það að segja hvernig verðþróunin verður,” segir hann. Þórarinn tekur þó fram að verð á mat í versluninni muni haldast óbreytt.