Flóttamannavandinn og ábyrgð Evrópu útskýrð á mannamáli á þremur mínútum

Áður en borgarastyrjöldin hófst í Sýrlandi fyrir tæplega fjórum og hálfu ári bjuggu 20 milljónir manna í landinu. Síðan hafa tólf milljónir yfirgefið heimili sín. Af þeim búa átta milljónir annars staðar í landinu og fjórar milljónir sem flóttamenn í nærliggjandi löndum. Aðallega Tyrklandi, Líbanon og Georgíu.

Þetta kemur fram í vel framsettri þriggja mínútna langri skýringu Hans Rosling á flóttamannavandanum sem sjá má í myndbandi neðst í fréttinni. Sláandi myndir birtast á degi hverjum af börnum sem fullorðnum, ýmist lifandi eða látnu, og kalla fjölmargir Íslendingar eftir því að ríkisstjórnin falli frá áformum sínum um að taka við fimmtíu flóttamönnum í ár og á næsta ári. Sú tala eigi að vera hærri og jafnvel miklu hærri.

Á myndinni hér til vinstri má sjá aukningu í fjölda umsókna flóttamanna um hæli undanfarin fjögur ár. Myndin er úr fréttaskýringu New York Times.

Sjá einnig: Bjarni Ben segir stjórnvöld hljóta að bregðast við

Aðeins um 250 þúsund flóttamenn frá Sýrlandi hafa komist til landa Evrópusambandsins sem svarar til aðeins um 2% þeirra sem þurft hafa að flúa heimili sín. Þetta fólk á ekki kost á að óska eftir hæli í sendiráðum nærliggjandi landa. Finni það leið til að koma sér til lands innan ESB getur það sótt um hæli þar. Því reyni fjöldi fólks að koma sér á illa búnum og yfirfullum bátum til landa á borð við Grikklands og Makedóníu. Hermenn hafa reynt að gæta landamæranna og í sumum tilfellum beitt táragasi.

Taka mikla áhættu

Til þess að komast til landa innan ESB þarf þetta sama fólk að taka mikla áhættu og greiða háar fjárhæðir. Landamæri ESB eru ekki opin fólkinu og því er um ólöglegan innflutning að ræða.

Þrátt fyrir það tekur fólkið áhættuna um von um betra líf enda ástandið heima fyrir vægast sagt slæmt.

Sjá einnig:Íslenskur forritari safnar milljónum fyrir sýrlenskan flóttamann

Rosling nefnir kvótaáætlun ESB, samþykkt í maí 2015, sem gefur flóttamönnum færi á að sækja um hæli áður en það leggur upp ferð sem gæti endað með ósköpum eins og í tilfelli um sex þúsund flóttamanna undanfarið eitt og hálft ár.

Það eru tæplega tvisvar sinnum fleiri en féllu í árásunum á Tvíburaturnana í New York og um fjórum sinnum fleiri en dóu þegar Titanic sökk.

Sjá einnig: Flóttamenn frá Króatíu á Íslandi segja sögu sína

Löndin innan ESB eru hins vegar aðeins tilbúin að taka á móti 20 þúsund flóttamönnum í heildina. Svo jafnvel ef aðeins er litið til flóttamanna frá Sýrlandi svarar það aðeins til 0,2% af heildinni, 12 milljónum Sýrlendinga. Hlutfallið er einn á móti 500. 

Yfir sex þúsund Íslendingar hafa skorað á stjórnvöld að taka við 5000 flóttamönnum á Fésbókarsíðu sem komið var á koppinn í gær. Rétt er að taka fram að þótt ástandið sé sérlega slæmt hjá flóttamönnum í Sýrlandi vegna átaka þar í landi er vandamálið enn stærra. Sameinuðu þjóðirnar telja að um 300 þúsund flóttamenn hafi hætt lífi sínu í áhættusömum og ólöglegum fólksflutningum það sem af er ári. Reglulega í vetur bárust til að mynda fregnir af björgunarstörfum varðskipsins Týs á Miðjarðarhafi. 

Where Are the Syrian Refugees Today?

Posted by Gapminder on Tuesday, June 9, 2015