Veðurstofan varar við mikilli úrkomu á Suðausturhorninu næstu daga

Veðurstofan varar við talsverðri eða mikilli rigningu allt frá Mýrdalsjökli austur á Austfirði og einnig á norðanverðum Ströndum næstu tvo sólarhringana. Hætta er á skriðuföllum á Suðausturlandi auk þess sem búist er við vexti í ám. Rigning getur farið upp í allt að 100 millimetra á láglendi.

Veðurstofan biður fólk um að fylgjast vel með veðurspám áður en lagt er af stað í ferðir á Suðausturhorninu og á norðanverðum Ströndum þar sem búist er við mikilli úrkomu. Hætta er á skriðuföllum, einkum á þjóðvegunum undir Vatnajökli auk þess sem ár geta orðið varasamar vegna vatnavaxta allt frá Fjallabaki og alveg austur á Austfirði. Þeir sem hyggja á ferðir á hálendinu á þessum slóðum eru beðnir um að athuga það að ár geta orðið illfærar vegna mikillar úrkomu.