Viking náði í stig á heimavelli eftir að lenda undir

Viking Stavanger gerði jafntefli við Noregsmeistara Strömsgodset, 1-1, í 24. umferð úrvalsdeildarinnar í fótbolta þar í landi í kvöld.

Iver Fossum náði forystunni fyrir gestina á 15. mínútu en Samuel Adegbenro jafnaði metin fyrir Viking tólf mínútum fyrir leikslok, 1-1.

Indriði Sigurðsson, fyrirliði, var að vanda í byrjunarliði Viking sem og Jón Daði Böðvarsson, en Steinþór Freyr Þorsteinsson sat allan tímann á bekknum.

Viking hefur verið á miklum skriði undanfarið, en með jafnteflinu komst liðið upp í annað sæti deildarinnar. Það er með jafn mörg stig og Stabæk sem á þó leik til góða.

Rosenborg er með góða forystu; er með 55 stig og á sjö leiki eftir en Viking sex leiki.