Stuðningsmennirnir á EM sáttir: "Upphafið að einhverju mögnuðu“

Stuðningsmenn íslenska landsliðsins í körfuknattleik eru nú flestir komnir heim eftir ævintýralega dvöl í Berlín síðustu daga. Þótt árangur landsliðsins á nýafstöðnu Evrópumóti hafi verið framar öllum vonum og vakið mikla athygli stálu stuðningsmenn liðsins oft senunni með ótrúlegum stuðningi gegnum leikina og eftir að þeim lauk.

Um eitt þúsund Íslendingar fylgdust með leikjum landsliðsins í Berlín, þeirra á meðal hjónin Eyjólfur Ólafsson og Guðrún Soffía Sigurðardóttir sem búa í Hafnarfirði. Eyjólfur segir að þau hjónin hafi ekki haft miklar væntingar fyrir mót, sérstaklega eftir að Ísland lenti í sannkölluðum dauðariðli.

Sjá einnig: Er körfuboltinn kominn heim?

„Þegar styttast fór í mótið og maður fór að upplifa stemninguna kringum liðið þá fór ég að gera mér væntingar um að við myndum stríða þessum liðum og jafnvel vinna einn leik,“ segir Eyjólfur. „Við reiknuðum hins vegar með að strákarnir myndu gefa allt í þetta og ekki hengja haus og þeir stóðust svo sannarlega þær væntingar og gott betur. Það er búið að vera unun að fylgjast með þeim spila á þessu móti og það á móti nokkrum af bestu liðum Evrópu.“

Frábær stemning

Leikmenn landsliðsins spiluðu fimm leiki á sex dögum og því snerist líf þeirra Eyjólfs og Guðrúnar eðlilega um körfubolta nær allan tímann. 

„Fyrstu dagana hittust stuðningsmenn í bjórgarðinum á Urban Spree en síðar á Holiday Inn sem stendur við hlið hallarinnar. Stemningin fyrir leikina var vægast sagt frábær og fullt út úr dyrum af bláklæddum Íslendingum. Þar fékk maður sér kannski einn öl eða tvo og spjallaði við aðra stuðningsmenn áður en öll hersingin gekk að höllinni. 

Við vorum með föst sæti á leikjunum og hvöttum strákana þar til við urðumn hás og aum í lófunum. Eftir leikina hittum við svo aðra stuðningsmenn aftur á Holiday Inn þar sem farið var yfir leiki dagsins og gengi.”

Magnaður lokaleikur

Lokaleikur liðsins gegn Tyrklandi var stórkostleg skemmtun en hann tapaðist eftir framlengdan leik.  

„Leikurinn gegn Tyrklandi var meiriháttar upplifun fyrir stuðningsmennina. Stúkan lagði allt í leikinn, alveg eins og strákarnir. Auðvitað var sárt að tapa leiknum en stemningin á pöllunum, bæði á leiknum og eftir hann, var ógleymanleg og verður líklega aldrei endurtekin. Við klöppuðum og sungum allan leikinn og fengum liðsinni frá flestum Þjóðverjum, Serbum og Ítölum á vellinum. Aðaltrommuleikari stuðningshóps Þjóðverja útvegaði okkur sjö trommur og trommaði með okkur allan leikinn.“

Sjá einnig: Aðeins fimm með betri þriggja stiga nýtingu á EM en Haukur Helgi

Þau hjónin segja að þrátt fyrir naumt tap hafi andrúmsloftið eftir leikinn verið þannig að viðstaddir muni seint gleyma því.

„Hápunkturinn var svo þegar við sungum öll sem eitt „Ég er kominn heim.“ (Ferðalok) Sannarlega mögnuð upplifun sem mun styrkja bönd okkar í körfuboltanum á Íslandi og er upphafið að einhverju mögnuðu.”