Inter með fullt hús stiga | Slæmt kvöld hjá Juventus og Roma

Inter er enn með fullt hús stiga í ítölsku úrvalsdeildinni í fótbolta eftir 1-0 sigur á Verona á San Siro í kvöld.

Brasilíumaðurinn Felipe Melo skoraði eina mark leiksins á 56. mínútu en Inter er búið að vinna alla sex leiki sína í deildinni til þessa og einungis fengið á sig eitt mark.

Emil Hallfreðsson lék ekki með Verona vegna meiðsla en liðið er í 15. sæti deildarinnar með þrjú stig.

Vandræði Juventus halda áfram en ítölsku meistararnir gerðu 1-1 jafntefli við nýliða Frosinone á heimavelli.

Simone Zaza kom Juventus yfir á 50. mínútu og þannig var staðan þangað til í uppbótartíma þegar Leonardo Blanchard jafnaði metin og tryggði Frosinone sitt fyrsta stig í deildinni.

Juventus er í 13. sæti deildarinnar með fimm stig eftir fimm leiki.

Þá tapaði Roma 2-1 fyrir Sampdoria á útivelli. Ítalski landsliðsmaðurinn Éder kom Sampdoria yfir á 50. mínútu en Mohamed Salah jafnaði metin á þeirri 69. Kostas Manolas tryggði svo Sampdoria sigurinn þegar hann setti boltann í eigið mark fimm mínútum fyrir leikslok.