Guðlaugur Victor og félagar náðu ekki að fylgja eftir frábærum fyrsta leik

Guðlaugur Victor Pálsson lék sinn annan leik með danska úrvalsdeildarliðinu Esbjerg í kvöld en það gekk ekki eins vel og í fyrsta leiknum.

Esbjerg-liðið var búið að ná í stig í fjórum leikjum í röð fyrir leik kvöldsins þar á meðal í fyrsta leik Guðlaugs Victors á dögunum þegar Esbjerg vann 4-2 heimasigur á OB.

Randers vann 2-0 sigur á Esbjerg í kvöld en bæði mörkin komu í fyrri hálfleiknum. Mikael Ishak skoraði fyrra markið á 2. mínútu og Nicolai Poulsen það seinna tíu mínútum fyrir hálfleik.

Guðlaugur Victor Pálsson lék á miðjunni en var tekinn af velli á 70. mínútu leiksins.

Esbjerg er í 10. sæti deildarinnar með níu stig í fyrstu níu leikjum sínum. Randers er með sjö fleiri stig og sjö sætum ofar.