Bjartsýnn á að kjarasamningarnir verði samþykktir

Þórarinn Eyfjörð, framkvæmdastjóri SFR stéttarfélags, segist bjartsýnn á að nýgerðir kjarasamningar félagsins við ríkið verði samþykktir. Atkvæðagreiðsla hófst í gær og er niðurstaðna að vænta á þriðjudag.

„Undanfarna daga höfum við farið um landið og kynnt samninginn. Á þessum kynningum sem ég hef verið á virðast félagsmann hafa tekið nokkuð vel í þetta,“ segir Þórarinn í samtali við Vísi.

Samningar tókust í síðustu viku eftir langar viðræður við ríkið. Viðræðurnar voru sameiginlegar á milli SFR, Sjúkraliðafélags Íslands og Landssambands lögreglumanna en félagsmenn munu á næstu árum fá allt að þrjátíu og tveggja prósenta launahækkun.

„Ég hef ekki fengið upplýsingar um þátttöku í atkvæðagreiðslunni, en við erum líka enn á fullu við að kynna samninginn. En miðað við það sem ég hef heyrt er hljóðið í mönnum þokkalega gott,“ segir Þórarinn.

Atkvæðagreiðsla hjá Landssambandi lögreglumanna hefst í næstu viku og er stefnt á að ljúka henni 18. nóvember.