Bubba leiðir fyrir lokahringinn á Bahamaeyjum

Bubba Watson er í kunnuglegri stöðu fyrir lokahringinn á Hero World Challenge sem fram fer á Albany vellinum á Bahamaeyjum en hann leiðir með tveimur höggum.

Bubba, sem hefur sigrað átta sinnum á PGA-mótaröðinni á ferlinum, er á heilum 19 höggum undir pari eftir fyrstu þrjá hringina en hann var í miklu stuði á þriðja hringnum í gær og lék á 63 höggum eða níu undir pari.

Hann fékk sjö fugla og einn magnaðan örn á hringnum en Englendingurinn Paul Casey kemur í öðru sæti á 17 höggum undir pari en hann lék einnig frábært golf á þriðja hring.

Jordan Spieth, sem sigraði á mótinu í fyrra með tíu höggum, er einnig í baráttu efstu manna en hann er á 15 höggum undir pari fyrir lokahringinn, fjórum á eftir Bubba.

Golfstöðin sýnir lokahringinn á Hero World Challenge í beinni frá klukkan 17:00 í kvöld.