Ekkert ferðaveður síðdegis

Nýjustu spár gefa áfram til kynna að óveðurslægð verði skammt suður af landinu síðdegis í dag. Þó er miðju lægðarinnar spá austar en í gær. Því verður vindur norðaustlægari og líklegast munu Vestmannaeyjar sleppa við ofsaveðrið.

Búist er við stormi, 20 metrum á sekúndu, á landinu síðdegis í dag og mestallan morgundaginn. Þá er búist við ofsaveðri, 28 metrum á sekúndu, við Öræfajökul, Mýrdalsjökul og Eyjafjöll seinni part dags. Þetta kemur fram í tilkynningu frá Veðurstofu Íslands.

Eftir hádegi mun vindur fara hratt vaxandi syðst á landinu og á Suðausturlandi og má búast við 40 og 50 m/s undir Eyjafjöllum og Mýrdalsjökli. Þá er talið að hviður fari yfir 50 m/s við Öræfajökul á milli klukkan 15 og 20 í dag. Í fyrstu mun snjóa á þessum slóðum en úrkoman mun síðan færa sig yfir í slyddu eða rigningu með tilheyrandi krapa á vegum.

Ekkert ferðaveður verður á þessum slóðum síðdegis í dag.

Annars staðar á landinu bætir einnig í vind síðdegis og undir kvöld verður víða orðið norðaustan hvassviðri eða stormur (15-23 m/s) með skafrenningi og síðar snjókomu þegar úrkomubakkinn færir sig norður yfir landið. Suðvesturland (þ.m.t. höfuðborgarsvæðið) sleppur best við veðrið, en þar verður samt orðið allhvasst undir kvöld með skafrenningi og dálítilli ofankomu um tíma.

Aukin snjóflóðahætta

Nú er nýsnævi víða um land og getur snjósöfnun í skafrenningi verið mjög hröð í gil og fjallsbrúnir sem snúa undan vindi. Við þessar aðstæður getur snjóflóðahætta skapast á skömmum tíma.

Athygli er einnig vakin á því að á morgun, laugardag, er útlit fyrir norðan storm með stórhríð á norðanverðu landinu, en sunnanlands verða stöku él og skafrenningur. Í nótt og á morgun má búast við að snjóflóðahætta aukist á Vestfjörðum og Norðurlandi.

Að lokum er útlit fyrir að lægi mikið á sunnudag og létti til, fyrst um landið vestanvert. Þá má búast við talsverðu frosti.