Stjórnvöld Rússlands og Tyrklands hafa staðið í miklum deilum síðustu vikuna, eftir að Tyrkir skutu niður rússneska sprengjuflugvél. Þeir segja að flugvélinni hafi verið flogið inn í lofthelgi Tyrklands, en því neita Rússar. Annar flugmaðurinn var skotinn til bana af uppreisnarmönnum á svæðinu, en hinum var bjargað af sýrlenskum sérsveitarmönnum eftir að hafa verið á flótta í tólf tíma. Rússneskur landgönguliði lét einnig lífið í björgunaraðgerðunum.
Vladimir Putin, forseti Rússlands, hélt því nýverið fram að Tyrkir kaupi mikið magn af olíu af Íslamska ríkinu. Einnig hefur því verið haldið fram að Recep Tayyip Erdogan, forseti Tyrklands, og fjölskylda hans eigi í viðskiptasambandi við ISIS.
Því hefur Erdogan neitað harðlega. Fyrr í dag sagði hann að Rússar ættu ekki að vera rógbera Tyrki. Lengi hefur verið vitað að smyglarar ISIS starfi í Tyrklandi og víðar. Síðast í gær sagði Barack Obama að Tyrkjum hefði tekist að loka stórum hluta landamæranna við Sýrland en að smyglararnir nýttu sér enn nokkrar leiðir.
Sjá einnig: Íslamska ríkið græðir á tá og fingri á olíu.
Samkvæmt þeim upplýsingum sem varnarmálaráðuneyti Rússlands hefur birt á Facebooksíðu sinni, hafa þeir borið kennsl á þrjár leiðir þar sem olía er flutt frá Sýrlandi til Tyrklands. Vopnuð gengi eru sögð stjórna landamærunum á þeim stöðum. Ein leiðin er að Miðjarðarhafinu og tvær inn í austurhluta Tyrklands. Meðal annars er olían færð í skip í tyrkneskri höfn.
Á myndunum og myndböndunum má sjá fjölda flutningabíla fara i báðar áttir yfir landamærin. Hafa ber í huga að færslur ráðuneytisins eru allar á rússnesku. Ekki hafa enn verið birtar upplýsingar sem eiga að sanna að Erdogan og fjölskylda hans standi í viðskiptum við ISIS.
