Svona verður helgarveðrið samkvæmt spám

Það verður fremur kalt um helgina ef marka má veðurspá Veðurstofu Íslands. Samkvæmt veðurfræðingi er gert ráð fyrir austan- og norðaustan átt í dag, 15 – 23 metrum á sekúndu í fyrstu, hvassast norðvestan til á landinu og allra syðst, en dregur smám saman úr vindi, yfirleitt 8 -15 metrar á sekúndu síðdegis en 5 – 13 metrar á sekúndu á morgun.

Skýjað með köflum og yfirleitt þurrt vestan til á landinu, en annars dálítil él, einkum suðaustan- og austanlands. Kólnar smám saman í veðri og seint á morgun ætti að vera komið frost um mest allt land. Næstu daga kólnar enn frekar og má búast við talsverðu frosti eftir helgi.

Veðrið í dag:

Austan og norðaustan 15-23 m/s, hvassast norðvestan til á landinu og allra syðst og víða hvassir vindstrengir við fjöll. Þurrt að mestu vestanlands, en annars dálítil él, einkum suðaustan- og austan til. Dregur smám saman úr vindi, 8-15 m/s síðdegis og úrkomuminna. Hiti um frostmark.

Á morgun:

Norðaustan 5-13 m/s á morgun. Bjart að mestu vestanlands, en dálítil él um landið austanvert. Frost 0 til 6 stig, en sums staðar frostlaust við sjávarsíðuna.

Á sunnudag:

Norðaustlæg átt 3-8 m/s, en 8-13 með SA-ströndinni. Stöku él um landið austanvert, en léttskýjað V-til. Frost 3 til 12 stig, svalast í innsveitum NA-lands.

Á mánudag:

Norðlæg átt 3-10 m/s og él SV-til, annars úrkomulítið. Vaxandi vindur NV-lands um kvöldið. Frost víða 4 til 15 stig, kaldast til landsins.

Á þriðjudag:

Ákveðin norðanátt með éljum fyrir norðan og SV-til í fyrstu, en bjart annars staðar. Kalt í veðri.

Á miðvikudag og fimmtudag:

Útlit fyrir norðlæga átt með éljum N-lands, en lengst af léttskýjað sunnan heiða. Talsvert frost.