Draumamark frá Birni Daníel í sigri Viking | Sjáðu markið

Björn Daníel Sverrisson og félagar hans í Viking frá Stavanger unnu sannfærandi 2-0 sigur á Vålerenga á útivelli í fyrstu umferð norsku úrvalsdeildarinnar í fótbolta í kvöld.

Björn Daníel skoraði fyrra mark liðsins á 23. mínútu með mögnuðu skoti fyrir utan teig sem söng í samskeytunum. Eitt af mörkum ársins komið strax í fyrstu umferð.

Virkilega skemmtilegt fyrir Hafnfirðinginn að stimpla sig strax inn eftir vonbrigðin í fyrra, en hann meiddist snemma á síðustu leiktíð og kom aðeins við sögu í átta leikjum.

Elías Már Ómarsson byrjaði á varamannabekknum hjá Vålerenga en kom inná á 63. mínútu. Viking innsiglaði sigurinn á 88. mínútu með marki Mathias Bringaker.

Hér má sjá markið hjá Birni Daníel.