Árni með þrennu og stoðsendingu

Árni Vilhjálmsson átti stórleik þegar Lilleström vann 1-4 sigur á D-deildarliði Aurskog-Höland í norsku bikarkeppninni í fótbolta í dag.

Árni kom með beinum hætti að öllum mörkum Lilleström í dag; skoraði þrjú sjálfur og lagði auk þess upp mark fyrir Bassel Jradi.

Árni kom Lilleström yfir strax á 7. mínútu en Aurskog-Höland jafnaði 20 mínútum síðar.

Í seinni hálfleik skoraði Árni svo úr tveimur vítaspyrnum, fyrst á 62. mínútu og svo á lokamínútunni. Í millitíðinni skoraði Jradi eftir undirbúning Árna.

Rúnar Kristinsson er þjálfari Lilleström en hann er á sínu öðru tímabili með liðið.