Eimverk hlaut Vaxtarsprotann

Eimverk er Vaxtarsproti ársins 2016 Sprotafyrirtækið Eimverk var valið Vaxtarsprotinn 2016 en hann hlýtur fyrirtæki sem hefur verið byggt upp með öflugum hætti á liðnu ári.

Vaxtarsprotinn var afhentur í morgun og það var Ragnheiður Elín Árnadóttir sem afhenti hann í Grasagarðinum í Laugardal. Eimverk ehf framleiðir vískí, gin og ákavíti og velta fyrirtækisins jókst um 333,3 prósent á milli ára.

„Sölutekjur Eimverks jukust úr tæplega 16,2 milljónum króna í 70,2 milljónir króna eða um 333,3%. Á sama tíma hefur starfsmannafjöldinn vaxið úr 5 í 8 en auk fastra starfsmanna hafa tveir sumarstarfsmenn að jafnaði komið að framleiðslunni,“ segir í tilkynningu um viðurkenninguna.

„Útflutningur og sala í fríhöfn hefur á undanförnum árum numið yfir 95% af veltu. Sögu Eimverks má rekja til ársins 2009 þegar tilraunir á framleiðslu á viskíi úr íslensku byggi hófust en fyrirtækið var síðan stofnað sumarið 2011. Fyrstu vörur fyrirtækisins komu síðan á markað 2013 eftir 4 ára starf við rannsóknir og vöruþróun.

Eimverk hefur sérhæft sig í framleiðslu á Single Malt viskíi, gini og ákavíti undir vörumerkjunum Flóki, Vor og Víti.  Afurðirnar sem eru allar unnar úr íslensku hráefni eru nú seldar um allan heim á sérhæfðum mörkuðum þar sem meira er lagt upp úr gæðum en magni.

Vörurnar eru meðal annars seldar í Þýskalandi, Ítalíu, Danmörku, Belgíu, Hong Kong, Ástralíu og Mexíkó auk þess sem dreifing er nýhafin í Bandaríkjunum. Nokkrar af afurðum fyrirtækisins hafa þegar unnið til alþjóðlegra viðurkenninga í sínum flokkum. Fyrirtækið er fjölskyldufyrirtæki en stofnendur voru fimm í upphafi, þau Haraldur Þorkelsson,  Sigrún Barðadóttir,  Egill Þorkelsson,  Eva María Sigurbjörnsdóttir, Hlynur Þorkelsson og Þorkell Jónsson.“

Vaxtarsprotinn er samstarfsverkefni Samtaka iðnaðarins, Samtaka sprotafyrirtækja, Háskólans í Reykjavík og Rannsóknarmiðstöðvar Íslands.

Þetta er í 10. skiptið sem viðurkenningarnar eru veittar en tilgangur verkefnisins er að vekja athygli á góðum árangri sprotafyrirtækja í örum vexti og skapa þannig aukinn áhuga og skilning á uppbyggingarstarfi þessara fyrirtækja.