SkjárEinn skiptir um nafn

Sjónvarpsstöðin SkjárEinn heitir ekki lengur SkjárEinn eins og hún hefur gert frá stofnun heldur hlaut stöðin í dag nafnið Sjónvarp Símans.

SkjárEinn hóf útsendingar árið 1999 og voru þættir á borð við Djúpu laugina og Allt í drasli afar vinsælir á fyrsta áratug þessarar aldar. 

„Nýtt nafn endurspeglar umbyltinguna sem hefur orðið á bæði stöðinni og ekki síst Símanum sjálfum síðustu mánuði. Við viljum leggja áherslu á vörumerkið og sýn okkar um að verða leiðandi í afþreyingu, fjarskiptum og upplýsingatækni. Við kennum því stöðina við fyrirtækið,“ segir Orri Hauksson, forstjóri Símans, í fréttatilkynningu.  

Síminn gerði nýlega samning um EM2016 og mun sýna frá öllum leikjum íslenska landsliðsins á mótinu á rásinni Síminn Sport. SkjárEinn varð hluti af fjarskiptafyrirtækinu fyrir rúmu ári. Í haust var dagskrá rásarinnar opnuð og hún hætti því að vera áskriftarstöð.

„Nafnabreytingarnar ná yfir allar sjónvarpsstöðvar og streymisveitur Símans sem áður voru kenndar við Skjáinn. SíminnBíó, SíminnKrakkar og SíminnHeimur eru því ný nöfn í safni  Símans. Má segja að með þessum breytingum sé samruna fyrirtækjanna sem hófst í fyrra að fullu lokið. Sjónvarp Símans er frístöð og stendur öllum dreifiveitum til boða í mestu mögulegum gæðum,“ segir í tilkynningu.