Hjörvar fer yfir slakan árangur Lars á stórmótum

Sumarmessan var venju samkvæmt á dagskrá á Stöð 2 Sport í gærkvöldi. Þar fóru þeir Hörður Magnússon, Hjörvar Hafliðason og Gunnleifur Gunnleifsson yfir leik Íslands og Ungverjalands, hina tvo leiki gærdagsins á EM og Copa América.

Í yfirferð þeirra yfir leik Íslendinga og Ungverja í Marseille benti Hjörvar á hversu fáa leiki lið undir stjórn Lars Lagerbäck hafa unnið á stórmótum.

Sjá einnig: Lars harðorður: Við spiluðum án allrar skynsemi

Lars hefur stýrt Íslandi, Svíþjóð og Nígeríu í 23 leikjum á HM og EM frá árinu 2000 en aðeins fjórir þeirra hafa unnist.

Svíar unnu Nígeríu 2-1 á HM 2002 og Paragvæ 1-0 á HM 2006, Búlgaríu 5-0 á EM 2004 og Grikkland 2-0 fjórum árum síðar.

„Ég held að hann sé með 17% vinningshlutfall á stórmótum. Hann hefur aldrei unnið Evrópuþjóð á HM og allt í allt tvo fótboltaleiki á EM,“ sagði Hjörvar í þættinum í gærkvöldi.

„Hann var með þessa gullkynslóð Svía þar sem þú varst með Zlatan [Ibrahimovic], Henrik Larsson, [Olaf] Mellberg og [Freddie] Ljungberg.

„Og árangurinn í lokakeppni var þessi. Það virðist sem leikir í undankeppni henti honum betur. Hann er kannski pínu passívur,“ bætti Hjörvar við.

Sjá einnig: Svíar komnir til Marseille til að styðja Lagerbäck og Ísland | Myndband

Þrátt fyrir að hafa ekki enn unnið leik á EM í Frakklandi eiga íslensku strákarnir góða möguleika á að komast í 16-liða úrslit eins og farið er yfir hér.