Ármann Smári: Ekki gleyma því að Ísland er ósigrað á EM

Ármann Smári Björnsson, fyrirliði ÍA í Pepsi-deildinni, segir að pressan sé öll á Englandi fyrir leikinn gegn Íslandi í Nice í 16-liða úrslitum EM 2016 í kvöld. Þetta segir hann í samtali við heimasíðu Hartepool United sem hann lék með á árunum 2009-11.

„Hér á Íslandi hlakka allir til leiksins. Það eru allir að tala um þetta enda er þetta stærsti leikur sem íslenska landsliðið hefur spilað,“ segir Ármann Smári sem skoraði þrjú mörk í 41 leik fyrir Hartlepool.

Sjá einnig: Alan Shearer: Tap fyrir Íslandi yrði mesta niðurlæging í sögu enska landsliðsins

Miðvörðurinn sterki segir að íslenska liðið hafi allt að vinna en engu að tapa í leiknum í kvöld.

„Ísland hefur allt að vinna. Í hugum stuðningsmannanna hafa leikmennirnir þegar unnið,“ segir Ármann Smári.

„Það er draumur fyrir marga af íslensku leikmönnunum að mæta Englandi því enska úrvalsdeildin er svo stór hér á landi og allir eiga sitt uppáhalds lið. Það gerir leikinn enn sérstakari.“

Ármann Smári segir að íslenska liðið muni eflaust vera í vörn meirihlutann af leiknum í kvöld en reyni að koma Englendingum á óvart með skyndisóknum. Hann er bjartsýnn á góð úrslit.

„Við þurfum að spila frábærlega (og smá heppni) til að eiga möguleika í þessum leik en ég er þess fullviss að íslensku leikmennirnir eru ekki orðnir saddir. Það má heldur ekki gleyma því að Ísland er enn ósigrað á EM svo ég óska enska liðinu góðs gengis fyrir leikinn,“ segir Ármann Smári sem lék sex landsleiki fyrir Ísland á sínum tíma.