Lagerbäck: Ísland á sérstakan stað í mínu hjarta

„Ég finn það í hjartanu hversu nærri mér þetta stendur. Ég naut þess kannski ekki fyrstu 45 mínúturnar í dag en ég naut þess að starfa á Íslandi og það hafa verið forréttindi að taka þátt í þessu ferðalagi,“ sagði Lars Lagerbäck, fráfarandi þjálfari íslenska landsliðsins, á blaðamannafundi á Stade de France eftir leikinn í kvöld.

Hann segist afar þakklátur fyrir allan þann stuðning sem hann og íslenska landsliðið hefur fengið í gegnum tíðina.

„Allt það fólk sem hefur komið hingað út og allt það fólk sem er heima. Við höfum fengið svo sterk skilaboð að heiman. Og allt hefur verið svo jákvætt.“

Hann óskaði Frakklandi til hamingju með 5-2 sigurinn á Íslandi í kvöld og sagði að Frakkar væru með frábært lið.

„Þeir létu okkur líta illa út en við hjálpuðum þeim reyndar í fyrri hálfleik,“ sagði hann. „Þetta hefur verið frábært mót. Stórt takk til allra. Til ykkar líka,“ sagði hann og beindi orðum sínum að troðfullum sal af fjölmiðlafólki úr öllum heimshornum. „Þið hafið gefið okkur mjög jákvæð viðbrögð og mikla virðingu.“

Hann segist eiga margar góðar minningar frá ferlinum, líka með sænska liðinu. „En núna hef ég virkilega sterkar tilfinningar um þann tíma sem ég varði á Íslandi. Það hefur verið eitthvað virkilega sérstakt. Ísland á sér sérstakan stað í mínu hjarta.“

Hefur ekki áhyggjur af framtíðinni

Lagerbäck var spurður um framtíð íslenska liðsins og hvaða möguleikar væru í stöðunni fyrir Ísland.

„Það er alltaf erfitt að taka næsta skref þegar þú ert kominn svona langt á stórmóti eins og þessu. Ísland á erfiðan riðil í næstu undankeppni en þrátt fyrir ungan aldur hafa þessi leikmenn spilað lengi og geta haldið lengi áfram. Þetta lítur því vel út,“ sagði hann.

„Ef að KSÍ og íslensku félögin geta nýtt reynsluna af þessu móti og tekjurnar sem koma vegna þátttöku Íslands á EM og sett af stað mikilvæg verkefni eins og þróun ungra leikmanna, þá tel ég að framtíðin sé nokkuð björt.“

Alvöru íslenskt viðhorf

Hann sagði að fyrri hálfleikurinn sérsatklega hafi minnt á síðari leik Íslands og Króatíu í umspili fyrir laust sæti á HM 2014.

„Fyrsta hugsun mín um fyrri hálfleikurinn var að þetta leit alveg eins út og í þeim leik. Leikmenn lögðu mikið á sig en það var eitthvað andlegt sem brást. Við vorum ekki nógu skarpir í ákvarðanatöku okkar, vörðumst ekki vel og gerðum klaufaleg mistök. Við vorum passívir þegar við unnum boltann.“

En hann sagði við leikmenn eftir leik að þeir ættu að læra af þessu. „Það er mjög auðvelt að tapa leikjum, sérstaklega gegn svona sterkum liðum, þegar þú ert ekki 100 prósent.“

Hann hrósaði þó leikmönnum Íslands fyrir endurkomuna í seinni hálfleik. „Þeir spiluðu fótbolta og sýndu hvað þeir gátu. Frakkland leyfðu okkur ekki að koma til baka inn í leikinn. Þeir sýndu alvöru íslenskt viðhorf í seinni hálfleik. Ég sagði við leikmenn að þeir ættu ekki að gleyma því.“

Snýr ekki aftur í landsliðið

Lagerbäck útilokaði endanlega að starfa aftur með A-landsliði karla en útilokaði þó ekki að hann myndi starfa hjá KSÍ en á öðrum vettvangi.

„Ég sé ekki fyrir mér að fara í 100 prósent aðalþjálfarastarf en ef einhver telur sig hafa önnur not fyrir mig þá er ég opinn fyrir öllu,“ sagði Lagerbäck sem verður 68 ára í sumar.

„Ég loka engum dyrum. Ef einhver kemur með eitthvað áhugavert þá mun ég hlusta.“