Fjóla vill þriðja sætið í Suðurkjördæmi

Fjóla Hrund Björnsdóttir ætlar að gefa kost á sér í þriðja sæti hjá Framsóknarflokknum í Suðurkjördæmi fyrir komandi Alþingiskosningar. Hún er 28 ára gömul og er fædd og uppalin á Hellu, Rangárþingi ytra. 

Fjóla er stúdent af félagsfræðibraut úr Fjölbrautaskóla Suðurlands og er með BA próf í Stjórnmálafræði frá Háskóla Íslands. Þá er hún á sínu seinna ári í MPA meistaranámi í opinberri stjórnsýslu í fjarnámi í Háskóla Íslands.

„Ég hef starfað töluvert innan Framsóknarflokksins. Ég hef setið í fimm ár í stjórn Sambands ungra Framsóknarmanna og starfa þar nú sem gjaldkeri, sit í miðstjórn flokksins, er í stjórn Framsóknarfélags Rangæinga, er varaformaður Kjördæmissambands framsóknarfélaganna í Suðurkjördæmi, jafnframt hef ég setið í jafnréttisnefnd flokksins. Síðustu þrjú og hálft ár hef ég verið fyrsti varaþingmaður í Suðurkjördæmi fyrir flokkinn,“ segir Fjóla í tilkynningu.

„Þau mál sem að ég tel að séu mikilvæg á næsta kjörtímabili er innviðauppbygging í ferðaþjónustu, efling heilsugæslunnar út á landi, bætt samgöngukerfi á landsbyggðinni ásamt því að gera fólki kleift að stunda nám óháð búsetu, efnahagi og aldri.“