AGF vann langþráðan sigur | Malmö endurheimti toppsætið

Theodór Elmar Bjarnason og Björn Daníel Sverrisson voru báðir í byrjunarliði AGF sem bar sigurorð af AGF, 3-1, í dönsku úrvalsdeildinni í fótbolta í kvöld.

Þetta var fyrsti sigur AGF í sex leikjum en liðið er í 7. sæti deildarinnar með 11 stig.

Rúnar Alex Rúnarsson stóð í marki Nordsjælland sem tókst ekki að fylgja eftir góðum sigri á Lyngby í síðustu umferð. Nordsjælland er í 11. sæti með sjö stig.

Kári Árnason stóð vaktina í vörn Malmö sem vann 3-1 sigur á IFK Göteborg í sænsku úrvalsdeildinni.

Þetta var fyrsti leikur Malmö eftir að Viðar Örn Kjartansson, markahæsti leikmaður sænsku deildarinanr, var seldur til Maccabi Tel Aviv.

Malmö virtist ekki sakna hans í leiknum í kvöld en með sigrinum komst liðið aftur á topp deildarinnar. Malmö er nú með eins stigs forskot á Norrköping þegar níu umferðum er ólokið.

Þá gerðu Hammarby og Örebro 1-1 jafntefli. Ögmundur Kristinsson og Birkir Már Sævarsson léku allan leikinn fyrir Hammarby en Arnór Smárason var ekki með.

Hjörtur Logi Valgarðsson lék ekki með Örebro í leiknum í kvöld.