Stenson og Rose hefja leik fyrir Evrópu eins og síðast

Svíinn Henrik Stenson og Englendingurinn Justin Rose hefja leik fyrir evrópska liðið í Ryder-bikarnum þegar fjórmenningur fer af stað í dag en þeir voru einnig í fyrsta teymi Evrópumanna í Ryder-bikarnum á Gleneagles fyrir tveimur árum síðan.

Tvíeykið kom Evrópu í gang með 5/4 sigri á Bubba Watson og Webb Simpson en Evrópa vann öruggan sigur á heimavelli fyrir tveimur árum og er evrópska liðið nú búið að vinna þrisvar í röð.

Sjá einnig:Bandarískur golfdólgur pakkaði Stenson saman og græddi 200 dali

Stenson og Rose börðust um sigur á Ólympíuleikunum þar sem sá enski hafði betur en Stenson hefur verið í svakalegu formi í ár og varð fyrsti Svíinn í karlaflokki til að vinna opna breska meistaramótið í sumar.

Stenson og Rose mæta Patric Reed og Jordan Spieth, en Ryder-bikarinn hefst í hádeginu og byrjar bein útsending á Golfstöðinni klukkan 12.30.

Rory McIlroy og nýliðinn Andy Sullivan eru saman í fjórmenningi í dag en þeir mæta Phil Mickelson og Rickel Fowler. Martin Kamyer og Sergio Garcia takast svo á við Jimmy Walker og Zach Johnson. Í síðasta holli mæta svo Evrópumennirnir Lee Westwood og nýliðinn Thomas Pieters Bandaríkjamönnunum Matt Kuchar og Dustin Johnson.