Talstöðvartal Risanna var þeim dýrkeypt

NFL-deildin hefur sektað félagið New York Giants fyrir ólöglega notkun á talstöðvum í leik liðsins á móti Dallas Cowboys 12. desember síðastliðinn.

New York Giants fékk 150 þúsund dollara sekt sem jafngildir sautján milljónum íslenskra króna.

Þjálfarar NFL-liðsins eru margir, einn aðalþjálfari og svo margir undirþjálfarar sem sérhæfa sig í ýmsum þáttum liðsins. Það gengur oft mikið á í leikjum og menn nota tæknina til að vera í samskiptum sín á milli og við leikmenn inn á vellinum.

Þjálfarar geta haft samskipti við leikstjórnanda sinn í gegnum samskiptabúnað í hjálmi leikmannsins. Þeir hafa hinsvegar bara ákveðinn tíma til þess því fimmtán sekúndum áður en "skotklukkan" rennur út er sambandið rofið af sérstökum umsjónarmanni leiks sem er hlutlaus maður frá NFL.

Í umræddum leik New York Giants og Dallas Cowboys þá bilaði búnaðurinn og til að bjarga sér þá fóru þjálfarar New York liðsins að nota talstöðvar til að tala saman. Með því gat umræddur starfsmaður NFL ekki lokað á samskiptin á réttum tíma.

NFL komst að því að New York Giants liðið hafi notað talstöðvar ólöglega í fimm kerfum snemma í fjórða leikhlutanum.

Ben McAdoo, þjálfari New York Giants, fékk að auki 50 þúsund dollara sekt, 5,7milljónir króna, fyrir sinn þátt í „svindlinu“

New York Giants vann leikinn 10-7 og hefur unnið Dallas tvívegis á tímabilinu. Þetta eru einu töp Dallas-liðsins á tímabilinu.