Kólnar snögglega þegar líður á morguninn

Snögglega mun kólna þegar líður á morguninn sunnan og vestanlands og mun hitinn vera við frostmark.

Helga Ívarsdóttir, veðurfræðingur á Veðurstofunni, segir að nú sé sunnan hvassviðri eða stormur á landinu og talsvert mikil rigning sunnan og vestanlands en úrkomuminna fyrir norðan.

„Skilin eru nú yfir Reykjavík en eru þau á hraðri siglingu austur af og í kjölfarið kólnar snögglega með suðvestan hvassviðri eða stormi og éljagangi. Klukkan átta var um átta gráður í Reykjavík, en nú er byrjað að kólna hér vestast og vindurinn er byrjaður að snúast. Hitinn verður í kringum frostmark.“

Helga segir að það verði umhleypingar áfram og að næsti stormur sé væntanlegur á sunnudagskvöld. „Í næstu viku er útlit fyrir að verði heldur kaldara þannig að það verði meira um snjókomu. Það verða sviptingar í veðrinu alla vikuna.“

Um helgina og fram í næstu viku er spáð mjög órólegu veðri og ferðalangar eru því hvattir til að kynna sér vel veðurspá og færð áður en lagt er í hann.

Veðurhorfur á landinu næstu daga

Á laugardag: Suðlæg átt, 10-15 m/s, rigning eða slydda og hiti 0 til 5 stig. Snýst í suðvestan 10-18 með éljum og kólnar vestantil á landinu fyrir hádegi, en austantil síðdegis. Hægari vindur og úrkomulítið NA-til.

Á sunnudag: Vaxandi suðaustan átt, dálítil él og hlýnar, stormur um kvöldið og talsverð slydda eða rigning, en heldur hægari og úrkomulítið norðaustantil.

Á mánudag: Norðaustanstormur með snjókomu NV-til fram eftir degi, en annars hægari vindur og úrkomuminna. Norðan 13-20 um kvöldið og snjókoma eða él um landið norðanvert, en léttir til sunnanlands. Frost 0 til 6 stig, en sums staðar frostlaust úti við sjóinn.

Á þriðjudag og miðvikudag: Búast má við áframhaldandi lægðagangi með slyddu eða snjókomu í flestum landshlutum.