Geir Sveinsson: „Ég er bara mjög óhress með þessa spurn­ingu þína“

Landsliðsþjálfarinn Geir Sveinsson var eðlilega afar svekktur eftir eins marks tap okkar manna gegn Slóveníu á heimsmeistaramótinu í handknattleik fyrr í dag.

Í viðtali eftir leikinn brást Geir illa við spurningu Guðmundar Hilmarssonar, íþróttafréttamanns á Morgunblaðinu og Mbl.is, hvort að það væri ekki ljóst að það yrði „brekka það sem eftir er í riðlinum þar sem þið eruð án stiga eftir fyrstu tvo leikin?“

Geir sagðist ekki skilja spurninguna.

„Það er al­veg vitað að við þurf­um stig til að kom­ast áfram. Ef við vor­um með vænt­ing­ar um að taka þrjú eða fjög­ur stig út úr þess­um tveim­ur fyrstu leikj­un­um þá tal­ar þú um brekku héðan í frá. Ég er bara mjög óhress með þessa spurn­ingu þína,“ sagði Geir og bætti svo held­ur bet­ur í rödd­ina; „Þetta er al­veg út úr korti. Að sjálf­sögðu er þetta brekka. Við erum komn­ir hingað til að vinna hvern ein­asta hel­vít­is leik og það er það sem við erum að gera. Við töpuðum með einu marki. Næsta spurn­ing,“ sagði Geir í viðtalinu.

Guðmundur segir Geir hafa orðið enn æstari í framhaldinu og að lokum orðið reiður. Svo reiður að hann rauk úr viðtalinu. Stuttu síðar sá Geir að sér, gekk til Guðmundar og bað hann afsökunar.

Ísland hefur nú spilað tvo leiki, gegn sterkustu andstæðingunum í riðlinum að margra mati. Í 27-21 tapinu gegn Spáni var fyrirliðinn Guðjón Valur Sigurðsson verulega pirraður með spurningu Þorkells Gunnars Sigurbjörnssonar, íþróttafréttamanns RÚV, um hinn margfræga „slæma kafla“.

Guðjón Valur er eiginlega kominn með leið á orðatiltækinu um slæma kafla #hmrúv 'Ekki byrja á þessu, gerðu það fyrir mig.“ pic.twitter.com/H0OHxy1y0K

— RÚV Íþróttir (@ruvithrottir) January 13, 2017

Svör Guðjóns Vals vöktu mikla athygli en þeir Þorkell féllust í faðma daginn eftir og gerðu upp fyrra viðtalið í öðru viðtali þar sem andrúmsloftið var léttara.

Guðjón Valur og Þorkell gerðu viðtalið í gærkvöld upp nú rétt áðan. #hmruv #handbolti pic.twitter.com/gadWxXFDtb

— RÚV Íþróttir (@ruvithrottir) January 13, 2017

Athygli vakti að Guðjón Valur var hvíldur í leiknum í dag og nýtti Bjarki Már Elísson tækifærið í fjarveru hans. Bjarki var að margra mati besti leikmaður Íslands í dag.

Geir útskýrði ákvörðun sína í viðtali við Arnar Björnsson að leik loknum. Viðtalið má sjá hér að neðan.

Ísland mætir Túnis í þriðja leik sínum á HM á morgun. Guðmundur og Gummi Ben grínuðust með uppákomuna á Twitter eftir leikinn eins og sjá má að neðan.

@GummiHilmars Nýtt Guðmundar & Geirs mál?

— Gummi Ben (@GummiBen) January 14, 2017