Nýtt vallarmet sett á Bahamaeyjum í gær

Alexis Thompson setti nýtt vallarmet á á Pure Silk Bahama Classic-mótinu á LPGA-mótaröðinni sem fer fram á Bahamaeyjum um helgina en þar þreytir Ólafía Þórunn Kristinsdóttir frumraun sína á þessari sterkustu atvinnumannamótaröð kvenna.

Ólafía hefur, líkt og Vísir hefur fjallað um undanfarna daga, byrjað af krafti og fylgdi hún eftir góðri frammistöðu á fyrsta degi með enn betri frammistöðu á öðrum hring.

Ólafía er í 20. sæti af 108 keppendum þegar mótið er hálfnað á sjö höggum undir pari en hún er tíu höggum á eftir Brittany Lincicome og níu á eftir Alexis sem átti sannkallaðan draumahring í gær.

Setti hún nýtt vallarmet er hún kom inn í klúbbhúsið á 61 höggi, tólf höggum undir pari. Innsiglaði hún það með að setja niður rúmlega níu metra pútt fyrir fugli á átjándu holu.

Í raun var Alexis sjóðheit með pútterin í gær en hún púttaði aðeins 22 sinnum á holunum átján eða rúmlega 1,22 pútt á hverri holu. Magnaður árangur á flötinni.

Hún er þó enn einu höggi á eftir Brittany sem fór holu í höggi á öðru hring í sjötta sinn á ferlinum. Stefnir allt í æsispennandi lokasprett á milli þessara bandarísku kylfinga.

Alexis varð heimsfræg árið 2007 þegar hún vann sér inn þátttökurétt á Opna bandaríska meistaramótin aðeins tólf ára gömul en hún varð að atvinnukylfing aðeins fimmtán ára árið 2010.