Hvassviðri eða stormur næstu daga

Veðurstofan varar við hvassviðri eða stormi allvíða næstu daga og ekki er útlit fyrir að það taki að lægja eða rofa til að ráði fyrr en í lok vikunnar. Búist er við annarri bylgju um næstu helgi.

Núna er austan- og suðaustanstormur víða um land en gera má ráð fyrir að það dragi talsvert úr vindi seint í nótt eða í fyrramálið. Þá gengur aftur í suðaustanhvassviðri eða –storm á morgun og hviðótt á norðvestanverðu landinu um kvöldið.

Á vef Veðurstofunnar segir að ekki sé útlit fyrir neina lognmollu um næstu helgi því þá sé von á annarri bylgju sem jafnvel endi með útsynningi eða éljaklökkum.

Veðurhorfur á landinu:

Austlæg átt, 15-23 m/s og rigning, hvassast á annesjum NA-til, en úrkomulítið fyrir norðan. Dregur heldur úr vindi og úrkomu í nótt. Sunnan og suðaustan 18-23 m/s á morgun og rigning með köflum, en þurrt að kalla fyrir norðan. Hiti 3 til 9 stig.

Á miðvikudag:

Suðaustan 18-25 m/s og talsverð rigning, hvassast V-ast, en úrkomulítið fyrir norðan. Hiti 5 til 10 stig. Hægari og úrkomuminni um kvöldið og kólnar heldur.

Á fimmtudag:

Suðlæg átt, víða 13-18 m/s og talsverð rigning eða slydda, en hægara síðdegis og rofar til á V-verðu landinu. Hiti 0 til 8 stig, hlýjast nyrst.

Á föstudag:

Suðlægar áttir og él V-til, en annars rigning eða slydda með köflum. Hiti kringum frostmark.

Á laugardag:

Vaxandi suðlæg átt með slyddu og síðar rigningu og hlýnandi veðri, en úrkomulítið fyrir austan.

Á sunnudag og mánudag:

Suðlæg átt og súld eða rigning með köflum og hlýtt í veðri, en þurrt að kalla NA-til.