Lítils háttar slydda í dag

Gera má ráð fyrir sunnan golu eða kalda í dag og lítils háttar rigningu eða slyddu sunnan- og vestan til. Hins vegar verður léttskýjað á Norður- og Norðausturlandi.

Hiti verður á bilinu eitt til átta stig en líklega verður frost í innsveitum norðaustantil. Á morgun má búast við suðaustan átta til þrettán metrum á sekúndu. Þurrt norðaustanlands, annars súld eða rigning og milt veður. Áfram dumbungur á miðvikudag en rofar til á fimmtudag, að því er segir á vef Veðurstofunnar.

Vegir eru að mestu greiðfærir um allt land en sums staðar er þokuloft. Nokkuð dimm þoka hefur verið á Hellisheiði.

Veðurhorfur á landinu næstu daga

Á þriðjudag:

Suðaustanátt, víða 8-13 m/s og súld eða rigning, en þurrt NA-lands. Hiti 3 til 8 stig.

Á miðvikudag:

Fremur hæg austlæg átt og rigning eða slydda, hiti 1 til 6 stig.

Á fimmtudag:

Norðanátt og stöku él N-lands, annars þurrt. Kólnandi veður.

Á föstudag:

Austanátt með rigningu eða slyddu S-til á landinu, en snjókomu N-lands síðdegis. Hiti 0 til 7 stig, en vægt frost á N-verðu landinu fram eftir degi.