Hnífstungan á Metro: Ekki tengsl á milli árásarmannanna og fórnarlambsins

Mennirnir tveir sem handteknir voru í gærkvöldi grunaðir um hnífstunguárás á veitingastaðnum Metro í Kópavogi voru yfirheyrðir í gær af lögreglunni á höfuðborgarsvæðinu. Þeir eru enn í haldi lögreglu. Ekki hefur verið tekin ákvörðun um hvort krafist verði gæsluvarðhalds yfir þeim en það verður ákveðið fljótlega. Mennirnir, sem eru á tvítugsaldri, hafa ekki komið við sögu lögreglu áður.

Grímur Grímsson, yfirlögregluþjónn, segir í samtali við Vísi að svo virðist sem ekki séu tengsl á milli árásarmannanna og mannsins sem var stunginn en hann hlaut alvarlega áverka og var fluttur á gjörgæslu í kjölfar árásarinnar.

Að sögn Gríms voru nokkur vitni að árásinni, bæði gestir veitingastaðarins og starfsmenn hans. Grímur segir að þó nokkrir hafi verið yfirheyrðir í tengslum við rannsókn málsins sem er langt komin.

Einn starfsmanna Metro sem var á vakt í gærkvöldi þegar árásin átti sér stað sagði í samtali við Vísi að hún hafi verið að þrífa þegar hún heyrði manninn reka upp öskur. Hún hafi svo komið fram og þá hafi verið blóð úti um allt.

Eftir hringt hafi verið á lögreglu átti starfsmaðurinn samtal við stelpur sem voru inni á staðnum og urðu vitni að árásinni. Að þeirra sögn hafi maðurinn verið að fá sér að borða þegar tveir piltar hafi komið inn á staðinn og haft í hótunum við hann, að því er virðist af tilefnislausu.

Þeir hafi síðan farið rétt úti fyrir dyragætt staðarins þar sem annar piltanna stakk manninn. Maðurinn hafi í kjölfarið komið aftur inn og beðið viðstadda um að hringja á sjúkrabíl. Voru árásarmennirnir þá á bak og burt en þeir voru handteknir af lögreglu um klukkutíma eftir að árásin varð, eða um hálfníuleytið í gærkvöldi. Annar mannanna var handtekinn á Ártúnshöfða en hinn við Smáraskóla.