PSG rúllaði yfir Monaco og vann deildabikarinn fjórða árið í röð

Paris Saint-Germain rúllaði yfir Monaco í úrslitaleik franska deildabikarsins í fótbolta í kvöld. Lokatölur 4-1, PSG í vil.

Leikurinn var aðeins fjögurra mínútna gamall þegar Julian Draxler kom PSG yfir eftir sendingu frá Ángel Di María.

Thomas Lemar jafnaði metin á 27. mínútu en Di María kom PSG aftur yfir þegar hann skoraði annað mark liðsins mínútu fyrir hálfleik.

Í seinni hálfleik bætti Edinson Cavani tveimur mörkum við og 4-1 sigur PSG því staðreynd.

Þetta er fjórða árið í röð sem PSG vinnur deildabikarinn.