Heitasti knattspyrnustjórastóll Evrópu stendur áfram undir nafni

Yfirboðarar knattspyrnufélagsins Palermo eru ekkert að hika mikið þegar kemur að því að taka erfiðar ákvarðanir með knattspyrnustjóra félagsins.

Palermo rak í gær knattspyrnustjóra sinn en þetta er sá fjórði sem þarf að taka pokann sinn á þessu tímabili. Diego Bortoluzzi, fyrrum stjóri Swansea City, er nú tekinn við liðinu.

Diego Lopez er sá síðasti sem fékk sparkið en hann fékk aðeins tíu leiki. Undir stjórn Diego Lopez vann Palermo aðeins einn leik í ítölsku A-deildinni. Hann hafði tekið við í janúar en síðasti leikur hans var 4-0 skellur á móti AX Milan á sunnudaginn.

Palermo er átta stigum frá öruggu sæti og útlitið er því ekki bjart. „Það þurfti að hrista vel upp í liðinu. Ég er að reyna allt sem ég get til að fá leikmenn til að rífa sig í gang og mæta með höfuðið hátt,“ sagði forsetinn Paul Baccaglini.

Davide Ballardini byrjaði tímabilið en komst að samkomulagi um að hætta í september. Roberto de Zerbi tók við en var rekinn í nóvember og Eugenio Corini, sem tók við af honum, hætti í janúar.

Palermo fór í gegnum fimm þjálfara á aðeins þriggja mánaða kafla á síðustu leiktíð og nýjasti þjálfari liðsins, Diego Bortoluzzi verður sá tólfti á tveimur árum.

Maurizio Zamparini var forseti Palermo í fimmtán ár og var alls með 40 þjálfara á þeim tíma. Paul Baccaglini tók við af honum í síðasta mánuði og var fljótur að feta í fótsport forvera síns.

Palermo-liðið var í B-deildinni 2013-14 en komst strax upp aftur. Þetta er eina tímabilið utan A-deildarinnar frá 2004 en nú þarf kraftverk frá nýjum þjálfara til að bjarga liðinu frá falli.