Segir engan starfsmann United Silicon missa vinnuna þrátt fyrir framleiðslustopp

Talsmaður United Silicon segir að enginn starfsmaður muni missa vinnuna þrátt fyrir að kísilmálmframleiðsla sé stopp og ekki ljóst hvenær starfsemi geti hafist aftur. Á meðan verður Reykjanesbær af tekjum. Þrátt fyrir það styður bæjarstjórinn að öllu leiti aðgerðir Umhverfisstofnunar um tímabundna lokun.

United Silicon hefur starfsleyfi fyrir fjórum ljósbogaofnum sem að framleiða kísilmálm. Hver ofn á að framleiða 22.900 tonn á ári. Fyrsti ofninn var gangsettur um miðjan nóvember á síðasta ári og fékk nafnið Ísabella. Síðan þá hefur allt gengið á aftur fótunum. Stefna fyrirtækisins var að verða stærsta kísilmálmverksmiðja í heimi.

Fréttastofa hefur ítrekað reynt að fá forstjóra fyrirtækisins Helga Þórhallsson í viðtal en án árangurs.

Enginn framleiðsla hefur verið hjá fyrirtækinu frá því að eldur kom upp í verksmiðjunni aðfaranótt þriðjudags en slökkva þurfti á eina ljósbogaofni verksmiðjunnar vegna slökkvistarfa. Þann sama dag ætlaði Umhverfisstofnun að framkvæma viðamikla úttekt á starfseminni á staðnum og hugðist stöðva hana vegna þeirra fjölmörgu mengunarmála sem komið hafa upp á aðeins fimm mánaða starfs tíma fyrirtækisins.

Fyrirtækið hafi frest til hádegis í dag til þess að skila andmælum vegna lokunarinnar en fékk framlengingu til miðnættis á mánudag.

Stjórnendur United Silicon boðuðu til starfsmannafundar í dag þar sem starfsmönnum var gerð grein fyrir stöðu fyrirtækisins.

Hvað var farið yfir með starfsmönnum á fundi í morgun?

„Bara stöðuna eins og hún er í dag. Hvað er verið að gera og hvernig framtíðin lítur út,“ sagði Kristleifur Andrésson, öryggisstjóri United Silicon.

Hjá fyrirtækinu starfa rúmlega sextíu manns og segir Kristleifur ugg í þeim vegna stöðunnar.

„Starfsmenn lesa fréttir og þeir auðvitað óttast það sem er verið að tala um í fréttum en við gátum leiðrétt þar sem hefur komið fram í fréttum og við sjáum framtíð og starfsmenn sjá framtíð,“ segir Kristleifur.

Kristleifur segir sérfræðinga frá framleiðanda og frá Noregi leiti allra leiða til þess að koma í veg fyrir þá mengun sem komið hefur frá fyrirtækinu frá því ljósbogaofninn var gangsettur.

„Við ætlum ekkert að setja í gang fyrr en það eru komnar einhverjar lausnir til þess að lágmarka þessa lykt,“ segir Kristleifur.

Hvað búist þið við að vera stopp lengi?

„Eins lengi og þarf,“ segir Kristleifur.

Í dag koma enga tekjur inn til fyrirtækisins þar sem framleiðslan er stopp en Kristleifur segir fyrirtækið vel í stakk búið til að takast á við það.

„Það er búið að fjármagna það,“ segir Kristleifur.

Er það gert með rekstrarstöðvunartryggingu?

„Það eru nokkra leiðir til þess að en það er ekkert vandamál í því,“ segir Kristleifur.

Það er enginn að fara missa vinnuna?

„Nei,“ segir Kristleifur.

„Þetta verður ekki reyndin. Það er að segja ef þeir komast ekki fyrir þetta mennirnir og þeir sem stjórna þessu og koma þessu ekki í lag þá vera ekki reistir hér fleiri ofnar það er alveg á hreinu,“ segir Kjartan Már Kjartansson, bæjarstjóri Reykjanesbæjar.

Stöðvist starfsemi United Silicon til frambúðar getur það haft mikil áhrif á fjárhag Reykjanesbæjar en bærinn hefur lagt á annan tug milljarða í höfnina í Helguvík.

„Ef að stöðvunin verður til lengri tíma þá auðvitað hefur það áhrif á þær áætlanir sem að við erum að vinna eftir í dag en til skemmri tíma er þetta líka alvarlegt mál fyrir okkur að tapa þessum tekjum ef að af því yrði,“ segir Kjartan.