Björn Daníel Sverrisson skoraði sigurmark AGF

Björn Daníel Sverrisson var í byrjunarliðinu og á skotskónum í dag þegar lið hans AGF bar sigurorð á Viborg í dönsku úrvalsdeildinni, 1-0. Markið skoraði Björn Daníel á 66. mínútu.

Theodór Elmar Bjarnason var einnig í byrjunarliðinu en honum var skipt af velli á 72. mínútu leiksins.

Þrátt fyrir sigurinn er AGF á leið í umspil um að halda sæti sínu í deildinni. Liðið mætir þar Esbjerg sem endar í neðsta sæti 1. riðils en AGF endaði í þriðja og næst neðsta sæti 2. riðils.

Horsens, sem Kjartan Henry Finnbogason og Elfar Freyr Helgason leika með, mun mæta Viborg í umspilinu en nú þegar er ljóst að Horsens mun enda í þriðja sæti 1. riðils.