Jeppinn keyrði yfir Leiknismenn

Danski framherjinn Jeppe Hansen byrjar tímabilið af krafti en hann skoraði tvö mörk í 3-0 sigri Keflavíkur á Leikni F. í Inkasso-deildinni í dag.

Jeppe skoraði sömuleiðis í 1-1 jafnteflinu við Leikni R. í 1. umferðinni og er því kominn með þrjú mörk í tveimur leikjum í Inkasso-deildinni.

Með sigrinum komst Keflavík upp í 2. sæti deildarinnar. Leiknir F. er hins vegar í því tíunda með eitt stig.

Jeppe skoraði fyrsta mark leiksins í dag þegar hann skallaði fyrirgjöf Jurajs Grizelj í netið á 41. mínútu.

Jeppe bætti svo öðru marki við á 74. mínútu og það var í glæsilegri kantinum. Daninn klippti þá boltann smekklega í markið.

Reynsluboltinn Jóhann Birnir Guðmundsson negldi svo síðasta naglann í kistu Leiknismanna þegar hann skoraði þriðja mark Keflvíkinga fimm mínútum fyrir leikslok.

Upplýsingar um úrslit og markaskorara eru fengnar frá Fótbolta.net.