Emil með slitið krossband

Þróttarinn Emil Atlason er með slitið krossband í hné og spilar ekki meira með á tímabilinu.

Emil meiddist illa í 2-1 sigri Þróttar á Þór í 3. umferð Inkasso-deildarinnar á laugardaginn. Við nánari skoðun kom í ljós að krossband í hné er slitið.

Emil hefur verið gríðarlega óheppinn með meiðsli síðan hann kom til Þróttar fyrir síðasta tímabil.

Hann fótbrotnaði í 6-0 tapi fyrir Stjörnunni í 3. umferð Pepsi-deildarinnar í fyrra og missti af restinni af tímabilinu.

Emil, sem er 23 ára, hefur aðeins náð að spila sex deildarleiki með Þrótti. Í þeim hefur hann skorað þrjú mörk.

Emil hefur einnig leikið með KR, Val og þýska liðinu Prussen Münster á ferlinum. Hann varð Íslandsmeistari með KR 2013 og bikarmeistari 2012 og 2014. Emil varð einnig bikarmeistari með Val 2015.