Fylkismenn endurheimtu toppsætið

Fylkir endurheimti toppsæti Inkasso-deildarinnar með 2-0 sigri á Leikni R. í Árbænum í kvöld.

Fylkismenn hafa farið frábærlega af stað á tímabilinu og eru enn ósigraðir í sumar. Þeir eru með eins stigs forskot á toppi Inkasso-deildarinnar og komnir í 8-liða úrslit Borgunarbikarsins.

Leiknismenn eru líka komnir í 8-liða úrslitin í Borgunarbikarnum en hafa bara unnið einn leik í Inkasso-deildinni og sitja í 8. sæti hennar.

Hákon Ingi Jónsson kom Fylki yfir á 37. mínútu eftir að hafa unnið boltann á miðjunni, brunað upp og skorað.

Á 71. mínútu bætti Orri Sveinn Stefánsson öðru marki við. Hann skallaði þá boltann í netið eftir hornspyrnu Daða Ólafssonar.

Fleiri urðu mörkin ekki og Fylkismenn fögnuðu góðum sigri.

Upplýsingar um úrslit og markaskorara eru fengnar frá Fótbolta.net.