Þungur dómur í tug milljóna króna fjársvikamáli Kickstarter bróður

Einar Ágústsson, sem nefndur hefur verið Kickstarter-bróðir, var í dag dæmdur í þriggja ára og níu mánaða fangelsi í héraðsdómi Reykjaness fyrir fjársvik.

Einar var ákærður, ásamt félaginu Skajaqouda ehf., sem hann var í forsvari fyrir, fyrir að hafa blekkt fjóra einstaklinga sem létu honum í té 74 milljónir króna, annars vegar tveir karlmenn og ein kona sem samtals létu af hendi 30 milljónir og hins vegar karlmaður sem lét af hendi 44 milljónir króna. Hann neitaði sök.

Dómur í málinu var kveðinn upp í dag. Þá þarf þrotabú Skajaqouda að þola upptöku rúmra 74 milljón króna sem embætti sérstaks saksóknara lagði hald á. Þeir fjármunir verða nýttir til þess að greiða skaðabótakröfur þeirra sem Einar var sakaður um að hafa svikið í málinu.

Sakaður um að reka fjárfestingarsjóð sem aldrei hafi verið starfræktur

Einari var gefið að sök að hafa frá upphafi blekkt aðila málsins með því að halda röngum upplýsingum að þeim aðilum sem lögðu til fé í fjárfestingarsjóð Einars. Í ákærunni var því einnig haldið fram að sjóðurinn hafi aldrei verið starfræktur í eiginlegri mynd.

Við aðalmeðferð málsins þvertók Einar fyrir að sjóðurinn hafi aldrei verið starfræktur. Raunar sagði Einar að hann hafi alltaf verið heiðarlegur í samskiptum sínum við aðila sem honum var gefið að sök að hafa svikið fé út úr.

Nokkur hiti myndaðist í dómsal við aðalmeðferð málsins þegar einstaklingarnir sem Einar var sakaður um að hafa svikið báru vitni, sérstaklega eftir að Einar neitaði að hafa tekið á móti tíu milljón króna greiðslu, sem eitt vitni sagði að hafði verið afhent í plastpoka.

„Nei, það er ekki rétt. Það er svo alveg kolrangt. Þtta var tekið út af reikningnum okkar og hann fékk það“, sagði eitt vitni áður en hann sneri sér að Einari og sagði: Þú ættir að skammast þínn að vera hérna.“

Til frádráttar fangelsisdómi Einars kemur gæsluvarðhald sem Einar sætti í fjóra daga. Þá greiðir hann þóknun verjenda síns, 8,4 milljónir auk annars málskostnaðar.

Nokkuð var fjallað um Einar og bróður hans í fréttum á liðnu ári, meðal annars vegna þess að þeir söfnuðu metfé á fjármögnunarsíðunni Kickstarter fyrir ferðavindtúrbínum sem þeir ætluðu að framleiða. Þá settu þeir ferðavindtúrbínu á markað á dögunum, sem þeir segja að sé fyrsta ferðavindtúrbínan í heiminum. 

Þá gerðu þeir bræður einnig kröfu á ríkissjóð vegna 33 milljón króna sóknargjalda sem ekki hafa verið greidd til trúfélags Zúista á Íslandi. Bræðurnir eru tveir af þremur stofnendum félagsins sem var endurvakið af hópi manna sem hét því að endurgreiða meðlimum trúfélagsgjöld frá ríkinu.



Málið er í nokkurs konar pattstöðu en bræðurnir vilja peningana út úr félaginu og til sín.