Veigar: Svekktur að fá ekki tækifæri til að sanna mig

Veigar Páll Gunnarsson hefur verið lánaður frá FH til Víkings í Reykjavík og mætir á sína fyrstu æfingu með Víkingum nú í hádeginu.

„Ég held að þetta sé fínt skref fyrir mig. Ég verð að fá að spila einhvers staðar,“ segir Veigar Páll en hann hefur lítið sem ekkert fengið að spila með FH í sumar.

Veigar segist ekki hafa farið fram á að vera lánaður frá FH heldur hafi Logi Ólafsson, þjálfari Víkings, haft samband við FH og sóst eftir því að fá Veigar lánaðan.

„Logi hefur þekkt mig síðan ég var lítill pjakkur og veit hvað hann fær hjá mér. Mér leist strax vel á þetta og ég held að þetta sé hið besta mál. Það er fín stemning í Víkinni núna og spennandi hlutir að gerast þar. Það verður gaman að vera hluti af því. Ég er mjög sáttur með þessa lendingu.“

Veigar hefur ekkert slæmt um tímann hjá FH að segja þó svo hann hafi eðlilega viljað fá að spila meira.

„Það er búið að vera fáranlega gaman að vera í besta klúbbi á Íslandi og spila með öllum þessum leikmönnum. Eina sem ég er svekktur með er að hafa aldrei fengið tækifæri til þess að sanna mig. Ekki einu sinni á undirbúningstímabilinu. Það hefði verið gaman að fá að sanna mig fyrir félaginu. Svo hafa Flóki og Lennon verið sjóðheitir og því er auðvitað skiljanlegt að ég sé á bekknum. Ég er samt sáttur með minn tíma hjá þessum stórkostlega klúbbi,“ segir Veigar en hann verður 38 ára og samningslaus í lok tímabilsins. Framtíðin er óráðin.

„Ég hef lítið fengið að spila síðustu þrjú tímabil og mig langar ekki að enda ferilinn sitjandi á rassgatinu. Ég veit að hjá Víkingi fæ ég einhver tækifæri. Ég mun sjá til hvernig þetta tímabil spilast áður en ég tek ákvörðun um hvort ég taki eitt tímabil í viðbót. Maður verður að reyna að þekkja sinn vitjunartíma.“