Gott að sýna í kirkju á eftir banka

Um snúning himintunglanna nefnist sýning sem myndlistarkonan Marta María Jónsdóttir opnar klukkan 12 á morgun í safnaðarheimili Neskirkju, strax að aflokinni messu.

„Ég er ekki ýkja kirkjurækin en mér var boðið að sýna hér í safnaðarheimilinu og það er fallegt rými og áhugavert. Ég hugsaði ósjálfrátt um staðinn þegar ég vann verkin og fannst spennandi og forvitnilegt að sjá þau þar,“ segir listakonan.

Hún kveðst vera að fjalla um stórar, klassískar spurningar eins og tímann, eilífðina, ódauðleikann og tengsl vísinda og lista á sýningunni. „Ég var byrjuð á einföldum teikningum og verkum á pappír þar sem ég vann með hringi og þau þróuðust yfir í þessi málverk þegar ég fékk salinn. Fannst það passa. Þannig rúllaði þetta.“

Marta María tekur líka þátt í stórri samsýningu í Listasafni Reykjanesbæjar nú sem nefnist Abstrakt á 21. öldinni þar sem ungir abstraktmálarar sýna.

„Áður sýndi ég í Listasafni ASÍ og í janúar var ég með sýningu í Arion banka þannig að verkin mín eru sett upp í ýmsu samhengi. Mér finnst gott að sýna í kirkju á eftir banka.“