Haukar endurheimtu 5. sætið | Myndir

Haukar endurheimtu 5. sætið í Inkasso-deildinni með 1-2 sigri á ÍR í Mjóddinni í kvöld.

Andri Marinó Karlsson, ljósmyndari Fréttablaðsins og Vísis, var í Mjóddinni í kvöld og tók myndirnar hér að neðan.

Haukar hafa verið á góðri siglingu að undanförnu og unnið þrjá af síðustu fjórum leikjum sínum og gert eitt jafntefli.

ÍR hefur aftur á móti tapað fjórum leikjum í röð. Breiðhyltingar eru í 10. sæti deildarinnar með 11 stig, þremur stigum frá fallsæti.

Sergine Modou Fall kom ÍR yfir á 18. mínútu í leiknum í kvöld en Aron Jóhannsson jafnaði metin eftir hálftíma.

Staðan var 1-1 í hálfleik og allt þar til sex mínútur voru til leiksloka. Þá skoraði Alexander Helgason sigurmark gestanna úr Hafnarfirði. Lokatölur 1-2, Haukum í vil.

Upplýsingar um úrslit og markaskorara eru fengnar frá Fótbolta.net.