Höskuldur á leið til Bandaríkjanna

Höskuldur Gunnlaugsson mun að öllum líkindum ekki klára tímabilið með Breiðabliki í Pepsi-deild karla þar sem hann er á leið til Bandaríkjanna í nám.

Þetta staðfesti hann í samtali við Fótbolti.net í dag en Höskuldur átti stórleik í 4-2 sigri Breiðabliks á KA um helgina er hann lagði upp öll fjögur mörk sinna manna.

Höskuldur sló í gegn með Breiðabliki sumarið 2015 en átti erfitt uppdráttar í fyrra. Hann hefur verið þó verið öflugur síðustu vikurnar en Höskuldur hefur skorað eitt mark í alls tólf deildarleikjum í sumar.

Breiðablik er í sjöunda sæti Pepsi-deildar karla með fimmtán stig.