Sindri varði tvö víti í mikilvægum sigri Keflvíkinga | Sjáðu mörkin og vítavörslurnar

Sindri Kristinn Ólafsson varði tvær vítaspyrnur þegar Keflavík vann 0-3 sigur á Þór fyrir norðan í 19. umferð Inkasso-deildarinnar í kvöld.

Með sigrinum stigu Keflvíkingar stórt skref í áttina að Pepsi-deildinni. Þeir eru nú sjö stigum á undan Þrótti sem er í 3. sætinu.

Adam Árni Róbertsson kom Keflavík yfir á 32. mínútu. Sjö mínútum síðar fengu gestirnir umdeilda vítaspyrnu sem Jeppe Hansen skoraði úr. Þetta var hans 14. mark í Inkasso-deildinni í sumar.

Aðeins mínútu síðar skoraði Lasse Rise þriðja mark Keflvíkinga. Daninn hefur skorað fimm mörk í sjö leikjum síðan hann kom til Keflavíkur í júlí-glugganum.

Þórsarar spiluðu betur í seinni hálfleiknum. Á 53. mínútu braut Sindri á Sveini Elíasi Jónssyni innan teigs. Hann bætti hins vegar upp fyrir mistökin með því að verja spyrnu Gunnars Örvars Stefánssonar.

Mínútu fyrir leikslok fékk Þór aðra vítaspyrnu. Sveinn Elías fór á punktinn en Sindri gerði sér lítið fyrir og varði öðru sinni. Lokatölur 0-3, Keflavík í röð.

Þór er í 6. sæti deildarinnar með 30 stig.