Gert ráð fyrir 18 stiga hita

Þrátt fyrir að það gæti blásið og rignt dálítið í dag gerir Veðurstofan ráð fyrir tveggja stafa hitatölum um nánast allt land.

Þannig gæti hitinn farið í 18 stig norðaustantil þar sem jafnframt verður bjartviðri. Góða veðrið virðist því ekki alveg vera tilbúið að kveðja Seyðisfjörð þar sem mældist 23,4 stiga hiti um helgina.

Í öðrum landshlutum verður rigning með köflum og 5 til 10 metra vindhraði á sekúndu. Þó gert sé ráð fyrir hægari vindi á morgun verða áfram skúrir í flestum landshlutum. Þá mun einnig kólna lítillega.

Nánar á veðurvef Vísis.

Veðurhorfur á landinu næstu daga.

Á þriðjudag:

Suðlæg og síðar breytileg átt 3-8 m/s og skúrir eða dálítil rigning víða um land. Hiti 8 til 15 stig, hlýjast á Norðausturlandi.

Á miðvikudag:

Gengur líklega í hvassa austlæga átt með rigningu, talsverð úrkoma á Suðausturlandi og Austfjörðum. Hiti 8 til 15 stig, hlýjast suðvestanlands.

Á fimmtudag og föstudag:

Suðaustan kaldi eða strekkingur og rigning með köflum, en léttskýjað á Norður- og Austurlandi. Hiti 7 til 13 stig, hlýjast fyrir norðan.

Á laugardag:

Útlit fyrir hvassa suðaustanátt með rigningu. Hiti 10 til 15 stig.

Á sunnudag:

Ákveðin sunnanátt með vætu, en léttir til á Norður- og Austurlandi. Hiti 7 til 13 stig.