Eyjólfur færir klukkuna aftur

Einnig er stöðvum gert að bjóða farþegum að koma á framfæri kvörtunum og ábendingum með einföldum hætti, til að mynda um óeðlilega hátt verð eða slæma þjónustu. Leigubílstjórum verður einnig skylt að upplýsa farþega um þessi réttindi og að þeir geti kvartað til viðeigandi stjórnvalda.

Greint er frá þessu á vef Stjórnarráðsins. Eyjólfur Ármannsson innviðaráðherra lagði fram frumvarpið og hefur með þessu afnumið umdeildar breytingar á leigubifreiðalögunum sem samþykktar voru árið 2022, í tíð Sigurðar Inga Jóhannssonar innviðaráðherra.

Bílstjórar mótmæltu síðustu breytingum

Með lagabreytingunni árið 2022 voru skilyrði fyrir leigubílaakstri í atvinnuskyni rýmkuð, meðal annars með því að afnema reglur um heildarfjölda starfsleyfa og áðurnefnda stöðvarskyldu. Hagsmunasamtök leigubílstjóra lögðust gegn þessum breytingum sem samþykktar voru þegar Framsókn sat í ríkisstjórn með Sjálfstæðisflokki og Vinstri grænum en lögin auðvelduðu nýjum bílstjórum að komast inn á markaðinn.

Fyrir lagabreytingu síðustu ríkisstjórnar hafði Eftirlitsstofnun EFTA lýst því yfir að gildandi reglur um leigubílaleyfi á Íslandi væru ekki í samræmi við samninginn um Evrópska efnahagssvæðið. Þáverandi löggjöf hafi gert nýjum rekstraraðilum erfitt eða ómögulegt að komast inn á markaðinn.

Ætlað að tryggja aukið aðhald

„Það er fagnaðarefni að Alþingi hafi samþykkt nauðsynlegar breytingar á lögum um leigubifreiðaþjónustu. Stöðvaskylda hefur verið endurvakin og rafrænt eftirlit innleitt, sem tryggir aukið aðhald og öryggi í greininni. Ný reglugerð hefur nú lokið samráðsferli og verður ný námskrá kynnt fljótlega,“ er haft eftir Eyjólfi í tilkynningu ráðuneytisins.

„Þetta er fyrsta skrefið í að leggja grunn að leigubifreiðamarkaði sem byggir á fagmennsku, öryggi og gagnsæi. Markaði sem speglar þá gestrisni sem við viljum að einkenni Ísland. Farþegar eiga rétt á öruggu verðlagi og leigubílstjórar á heilbrigðu starfsumhverfi þar sem leikreglur eru skýrar.“

Boðar sérstakar númeraplötur

Eyjólfur boðar einnig breytingar á reglugerð sem snúi meðal annars að eftirliti Samgöngustofu með leyfishöfum, próftöku, eftirliti með námskeiðshöldurum, hátternisreglum leigubifreiðastöðva og kröfum um framsetningu á verðskrá og sýnileika á leyfisskírteinum.

Þá standi til að auðkenna leigubíla með sérstökum lituðum númeraplötum. Eyjólfur segir lagabreytingarnar sem samþykktar voru í dag vera fyrstu skrefin í heildarendurskoðun á starfsumhverfi leigubílstjóra.