Bill Murray kemur fram á Listahátíð í Reykjavík

Þema Listahátíðar árið 2018 verður HEIMA. Þemað skapar merkingarbært samhengi og dýpt í verkefnaval hátíðarinnar og tengir og speglar annars óskylda viðburði á áhugaverðan hátt. Á meðal þeirra sem koma fram á Listahátíðinni í ár er Bill Murray samkvæmt tilkynningu frá hátíðinni.

Eftir að hafa legið í dvala í mörg ár verður Klúbbur Listahátíðar endurvakinn á næsta ári.Hann verður opinn alla dagana sem hátíðin varir eða frá 1. til 17. júní næstkomandi og verður að þessu sinni staðsettur í Listasafni Reykjavíkur – Hafnarhúsi.  Efnt verður til samkeppni um útlit klúbbsins meðal listamanna og hönnuða sem verður auglýst í nóvember næstkomandi. 

Öll dagskráin verður tilkynnt í lok mars á næsta ári en búið er að kynna smá brot af því sem gestir hátíðarinnar geta átt von á.  

NEW WORLDS

Kvikmyndaleikarinn heimsþekkti og ólíkindatólið Bill Murray kemur aðdáendum sínum enn einu sinni á óvart. Nú með samstarfi við þrjá afburða klassíska hljóðfæraleikara. Óvenjuleg blanda af klassískri evrópskri tónlist, úrvals bandarískum bókmenntatextum og sönglögum sem Murray eru sérstaklega kær. Sýnt í Eldborg, Hörpu 14. & 15.júní 2018.

BRÆÐUR

Íslenska óperan í samstarfi við Den Jyske Opera og Sinfóníuhljómsveit Íslands sýna fyrstu óperu Daníels Bjarnasonar sem hefur hlotið einróma lof gagnrýnenda í Danmörku. Óperan er byggð á kvikmyndinni Brothers eftir Susanne Bier. Sýnt í Eldborg, Hörpu 9.júní 2018.    

MAHLER nr.2

Sinfóníuhljómsveit Íslands flytur Upprisusinfóníu Mahlers nr.2. Hljómsveitarstjórinn Osmo Vänskä þekkir tónmál Mahlers betur en flestir aðrir og hefur nýlega hljóðritað sinfóníuna með Minnesota- hljómsveitinni. Mótettukór Hallgrímskirkju kemur fram í stækkaðri mynd en einsöngvarar eru Christiane Karg og Sasha Cooke. Sýnt í Eldborg, Hörpu 1.júní 2018.

EDDA

Robert Wilson telst til áhrifamestu og framsæknustu leikhúslistamanna síðustu áratuga. Sýningar hans eru þekktar fyrir að vera mikið sjónarspil og unnar af tæknilegri nákvæmni. EDDA í uppsetningu Det Norske Teatret ber höfundareinkennum Wilsons sterkt vitni bæði í útliti og leikstíl og er þessi sýning ólík öllu sem áður hefur sést á íslensku leiksviði. Sýnt í Borgarleikhúsinu 16. & 17.júní 2018.

ÞAR RÍKIR FEGURÐIN EIN

Á þessari viðamiklu myndlistasýningu verða verk eftir listamenn sem mótað hafa íslenska listasögu allt frá upphafi 20. aldar og til samtímans en nokkur hluti verkanna verður nýr og unninn sérstaklega fyrir sýninguna. Sýnt í Listasafni Reykjavíkur, Hafnarhúsi 1.júní – 30.sept 2018.

ÓÐUR OG FLEXA

Íslenski dansflokkurinn sýnir glænýja sýningu um vinina Óð og Flexu.  Eftir ævintýralegt afmælispartý er allt á rúi og stúi heima hjá Óði og Flexu. Þau eru ennþá uppveðruð eftir að hafa ferðast um heima og geima með ímyndunaraflinu og nenna ómögulega að taka til eftir sig. Þá birtist þeim óvæntur gestur. Hver er hann? Hvaðan kom hann? Sýnt í Borgarleikhúsinu 2.júní og 3.júní  2018.