Óttarr hellir sér yfir Sigmund Davíð

Óttari Proppé, hinum ofurkurteisa formanni Bjartrar framtíðar, er loks nóg boðið. Þolinmæði hans er á þrotum.

„Mér blöskrar til reiðinnar heil óskapar býsn þessi eilífu fiff.“ En, þannig hefst reiðilestur Óttars, sem hann birti fyrir skemmstu á Facebooksíðu sinni.

Óttarr hellir sér yfir talsmenn annarra flokka fyrir innistæðulausan loforðaflaum og sérstaklega beinir hann spjótum sínum að Sigmundi Davíð Gunnlaugssyni, formanni Miðflokksins.

Kaupir sér vini með því að gefa nammi úr hillunum

„En mér blöskrar endanlega í dag þegar formaður Miðflokksins, Sigmundur Davíð Gunnlaugsson, trommar fram með nýjasta fiffið. Stjórnmálamaður sem leyndi því að hann væri kröfuhafi í bankana í gegnum aflandsfélög. Hann ætlar að gefa fólki verðmæti. Hann ætlar ekki að dreifa eigin auðæfum heldur almannafé,“ skrifar Óttarr og ljóst að honum er ekki skemmt.

„Fiffið felst í því að láta ríkið kaupa banka, væntanlega með skuldsetningu, og dreifa svo til almennings. Þetta er í forgangi á undan styrkingu heilbrigðiskerfisins, vegakerfisins eða menntakerfisins. Forgangsröðunin er skýr að leggja alla áherslu á að kaupa sér vinsældir. Fyrir mér er þetta eins og afgreiðslumaður í búð reyndi að kaupa sér vini með því að gefa nammi úr hillunum,“ skrifar Óttarr. Maðurinn sem hefur hingað til boðað aukna kurteisi í stjórnmálunum er rétt að hita upp. Því Sigmundur er ekki laus allra mála.

Blöskranleg framganga Sigmundar

„Síðast þegar sami stjórnmálamaður kynnti stórkostlegt fiff var 80 þúsund milljónum veitt framhjá verkefnum í velferðakerfinu og framhjá innviðauppbyggingu til að dreifa fjármunum til þeirra sem voru fegnir að njóta en voru kannski ekki í mestu þörfinni. Þeir fjármunir fóru að miklu leyti til eldri íbúa höfuðborgarsvæðisins með tekjur yfir meðallagi. Þeir fjármunir ýttu undir þensluna, þrýstu upp fasteignaverði og enn er ekki byrjað að byggja nýja landsspítalann sem var lofað á síðustu öld og unga fólkið er enn lengra frá því að komast út á húsnæðismarkaðinn. Manni blöskrar að fólk sé svo galið að reyna að selja það að endurtaka leikinn.“

Fyrst Óttarri er nóg boðið, manni sem hefur beitt sér sérstaklega fyrir nýjum stjórnmálum hvar menn nálgist hvor annan af virðingu, þá er óhætt að fullyrða að verulegur hiti sé hlaupinn i kosningabaráttuna. Og, ekki seinna vænna. Kosningar fara fram á laugardaginn næsta.