Biskup er í fríi og ekki til viðtals

Agnes M. Sigurðardóttir biskup Íslands er ekki til viðtals. Vísir vildi leita eftir nánari útskýringum á umdeildum ummælum hennar sem leitt hafa til úrsagna rúmlega 300 manns úr Þjóðkirkjunni. Og þá hvort biskupi þyki ómaklega lagt út af orðum hennar?

Sú sem varð fyrir svörum á Biskupsstofu sagði að Agnes biskup hefði verið í fríi að undanförnu og væri enn í fríi. Og það þýddi að hún væri í fríi: „Maður ónáðar ekki fólk í fríi.“ Biskup mun væntanlegur til starfa eftir helgi.

Vísir hefur greint frá ólgu innan Kirkjunnar en bæði Séra Davíð Þór Jónsson og Séra Hildur Eir Bolladóttir hafa sagt að Biskup Íslands tali ekki fyrir hönd Þjóðkirkjunnar í þessum efnum.

Ummæli Agnesar, að hún sé „ekki sammála því að allt sé leyfilegt í sannleiksleitinni. Mér finnst til dæmis ekki siðferðilega rétt að stela gögnum og fara á bak við fólk til að afhjúpa mál og leiða sannleikann í ljós,“ hafa verið sett í þráðbeint samhengi við lögbann sem sett hefur verið við fréttaflutning Stundarinnar byggðan á gögnum sem miðillinn hefur undir höndum frá Glitni banka. En, þar hefur verið greint frá viðskiptum Bjarna Benediktssonar forsætisráðherra. Þannig hefur Reynir Traustason stjórnarformaður Stundarinnar sagt sig úr Þjóðkirkjunni.

Ef biskup Íslands hefur viljað verja með óbeinum hætti hagsmuni Þjóðkirkjunnar, þá með því að lýsa yfir stuðningi við stjórnarflokkanna sem hafa það sem yfirlýsta stefnu að standa gegn hugmyndum um aðskilnað ríkis og kirkju, gæti það hafa snúist upp í andhverfu sína. Því 300 manns er stór biti, 266 sögðu sig úr Þjóðkirkjunni í gær og 41 það sem af er degi. En 1. janúar 2017 voru 236 þúsund manns skráð í Þjóðkirkjuna.