Stuðningsmenn þurfa að vera á tánum til að ná sér í miða á HM

Glugginn fyrir Íslendinga til að kaupa sér miða á leiki Íslands á Heimsmeistaramótinu í Rússlandi næsta sumer er 5. desember til 31. janúar.

Í gær var greint frá því að gríðarleg aðsókn væri í miðana og að 98 prósent miða sem í boði væru hefðu nú þegar verið seldir.

Sjá einnig:Gríðarleg aðsókn í miða á HM í Rússlandi

Hjörtur Hjartarson heyrði í Klöru Bjartmarz, framkvæmdarstjóra KSÍ, í dag og sagði hún að íslenskir stuðningsmenn þyrftu ekki að missa alla von enn, þessi 98 prósent hafi bara átt við þann hluta miða sem eru í boði í núverandi miðasöluglugga.

Miðasalan fer fram í nokkrum hlutum og er annar hluti hennar opinn núna. Besti glugginn til miðakaupa fyrir íslenska stuðningsmenn er þó ekki opinn enn, en hann er frá 5. desember til 31. janúar.

Í þessum glugga er hægt að sækja um miða á leiki Íslands, án þess að vita hvar þeir eru spilaðir eða á móti hverjum. Það verður dregið í riðla 1. desember næstkomandi og því geta stuðningsmenn verið betur upplýstir um leikina sem þeir eru að kaupa miða á.

Fyrirkomulagið er þó þannig að ekki er verið að kaupa miða, heldur sækja um þá. Stuðningsmenn sækja um hvaða leiki þeir vilja kaupa miða á.

Þegar glugganum líkur þá er tekið saman hvort fjöldi umsókna sé meiri en fjöldi miða í boði. Ef svo er er dregið um það hver fær miða. Ef ekki fá allir miða sem sóttu um.

Ekki skiptir máli hvort sótt sé um miða 6. desember eða 30. janúar, allir eiga jafn mikinn séns á því að fá miða.

Fjöldi miða sem er í boði fyrir íslenska stuðningsmenn er 8 prósent af þeim miðum sem eru í sölu á hverjum leik fyrir sig. Fari svo að Ísland spili á einum af minni leikvöngunum gæti miðafjöldinn því orðið ekki nema 2500 miðar.

Klara vildi einnig ítreka það að aðeins þeir miðar sem keyptir eru í gegnum fifa.com eru gildir inn á leikvangana. Komist upp um miðakaup í gegnum þriðja aðila þá verða þeir miðar ógildir. Einnig má ekki skipta um nafn á keyptum miðum.

Spjall Hjartar og Klöru í heildina má hlusta á í spilaranum hér að ofan.