Ferðamaður gekk berserksgang

Lögreglan hafði afskipti af drukknum manni við Laugaveg á ellefta tímanum í gærkvöldi. Um er að ræða erlendan ferðamann sem grunaður er um eignaspjöll, meðal annars er honum gefið að hafa sök að hafa brotið rúðu í bifreið. Í dagbók lögreglunnar er greint frá því að brot mannsins séu nokkur en þau ekki nánar tilgreind. Maðurinn var fluttur á lögreglustöðina á Hverfisgötu þar sem hann hefur sofið úr sér vímuna í nótt.

Annar maður var handtekinn við Fróðaþing í Kópavogi klukkan korter yfir fjögur í morgun, grunaður um innbrot í bifreiðar. Á manninum fundust munir sem taldir eru hafa verið úr bifreiðunum sem hann braust inn í. Hann var að sama skapi fluttur á næstu lögreglustöð fyrri rannsókn málsins.

Þá voru tveir ökumenn stöðvaðir grunaðir um akstur undir áhrifum vímuefna og einn ökumaður reyndist ökuréttindalaus og var akstur hans því stöðvaður.