Yfirskriftin er Hjónajól

Við erum komin í jólaskap, það verður ókeypis inn og dagskráin er létt og skemmtileg. Við tökum meðal annars tvær aríur úr La Bohème, óperu sem gerist um jólaleytið,“ segir Þórunn Marinósdóttir sópransöngkona um hádegistónleikana í Hafnarborg í Hafnarfirði í dag klukkan 12 þar sem hún syngur með manni sínum, Hlöðveri Sigurðssyni tenór og Antoníu Hevesi píanóleikara. Yfirskrift tónleikanna er Hjónajól.

Spurningu um hvort þau hjón séu oft með samsöng heima á kvöldin svarar Þórunn hlæjandi. „Okkur finnst að minnsta kosti gaman að syngja saman og það er alltaf fjör á heimilinu, söngur og gleði. Við eigum fjögur börn en erum reyndar hætt að syngja þau í svefn.“

Fleira eiga þau sameiginlegt en sönginn og börnin, lærðu til dæmis bæði hjá Kristjáni Jóhannssyni úti á Ítalíu. „Við lærðum líka samtímis í Salzburg í Austurríki, þar kynntumst við. Fluttum okkur svo til Ítalíu og bjuggum þá rétt hjá Kristjáni, í Desenzano við Gardavatn. Það var yndislegur tími og við förum alltaf reglulega til Ítalíu til að drekka í okkur menninguna,“ lýsir Þórunn.

Hafnarborg verður opnuð klukkan 11.30 en tónleikarnir hefjast klukkan 12 og eru öllum opnir meðan húsrúm leyfir. Hátíðarbragur er á efnisskránni og þar mun einnig leynast jólauppskrift úr eldhúsi hjónanna.